الفيتامينات و حاجتنا لها
كثير بنات يسألوني ليش انت ضد الفيتامينات ؟
انا مو ضدها ! كثير على فكرة انسأل هالسؤال ( غير صحيح ) انا مو ضدها ذا انت بحاجتها
انا دايم اقول الافضل تعوضينها بالاكل .. ليش؟
لان كل ما تقدمتي بالعمر احتجتي مساعدات خارجيه الله يحفظنا واياكم ويديم علينا الصحه و العافية ، بمعنى ممكن يصير عندك منظمات سكر بالمستقبل .. حبوب مثلاً للغده ، مسكنات نفسيه اي شي ممكن تحتاجينه بالمستقبل ..
والبعض وهذي نسبة كبيرة يكون عندها امراض استثنائية مثل تكيسات المبايض او غده او اكتئاب و تاخذ عليه ادوية لفترة زمنية طويلة و طبعاً هالشي ( واقعياً يزيد ما ينقص ) او امراض عرضية مثل الانفلونزا .. و ايضاً البعض قليلين شرب للماء .. فكل هذا يسبب
ضغط على الكبد و الكلى فكل ما قدرتي تستغنين افضل
لكن هذا لا يتعارض مع موضوع التحاليل الدوري وحاجتك لها ( لا تهملينه ) يعني الفكرة توازن و اتزان !
فالكلام هذا الي بقوله تحتاجه كل انثى من سن البلوغ حتى تموت ( لا تهملين تحاليلك الدورية ) و لو فيه نقص اهتمي فيه ..
“كل ما بدأتي بموضوع الفيتامينات اصغر ! كل ما تفاديتي مشاكل مع تقدم العمر”
– قاعدة
قلت لكم الموضوع نسبة وتناسب و توازن و اتزان
الفيتامينات الي بكلمكم عنها هذي كلنا نعرف ان مالها وصفة طبية و تقدرين تشترينها من المواقع او من الصيدلية :
فيتامين د
قبل فترة نسبة من الدكاترة جحدوا هالفيتامين وقالوا انه خُرافه .. مين جربت اعراض نقص فيتامين د انا شخصياً جربت ( يدمرك تدريجياً ) شي عجيب سبحان الله ..
هالفيتامين شي اساسي بالعظام و بعض الام الظهر بسبب نقصه .. ايضاً لصحة الاسنان ، و توازن حالتك النفسية و المزاجية ، الشعر وتنظيم الهرمونات .. و مهم للمناعة و صحة الجلد .
و كثير دراسات قالوا انه مثل المنظم يعني ممكن اهماله يسبب السكري و الضغط
ويجب اخذه من الولاده
يعني المفروض حتى الرضيع ياخذه من الولاده .. فيتامين مهم جداً و المفروض ما يُهمل !
طفل او بالغ .. رجل او انثى
وين القاه ؟
تلقينه بالشمس و بعض الاطعمه و كمكملات!
ولكن ! لو الشمس كافيه كان جونا المناخي حل المشكله ! وكان كلنا فيتامين د عندنا فُل !
لكن للأسف الاغلب فيتامين د ناقص عنده .. فيتامين د اكتسابه السريع يكون من التعرض للشمس في اوقات معينه و لكن ما نقدر ننكر ان المكمل مساعد مهم
الحديد
من اعراض نقصه عدم التركيز .. تدرين ليه ؟ لانه ينتج الهيموقلوبين المسؤول عن ايصال الاكسجين للدماغ!
يعني هو عامل مهم في التركيز و الادراك و ممكن يسبب دوخه و اغماء !
وهو الفيتامين الي ناقص عند كثير بنات بسبب الدورة الشهريه و الحمل والولاده
اعراض نقص الحديد
الحديد من الفيتامينات المهمه الي الجسم يحاول يخزنه بشكل دائم ولكن حتى المخزون يُستهلك وطول اليوم عشان يشغل الخلايا و ينقل الاكسجين! خصوصا المرأه !
ت س ت ه ل ك ه
المغنيسيوم
كلكم تعرفون متلازمة Pms
بالمناسبة : اغلب البنات يعتقدون انه شي طبيعي .. قد جربتوا تروحون طبيب عام ؟ على طول بيقولك روحي نساء و ولاده ..
لانه غير طبيعي .. لا تقولين لازم اتكيف لانه غير طبيعي 🙂 علمتكم
طيب وش علاقة PMS بالمغنيسيوم
احد اعراض الPMS نقص المغنيسيوم ولو صرفت لك الدكتورة مغنيسيوم بتشوفين فرق بين الاعراض قبل وبعد..
هل اخذه من كيفي ؟ لا انا حتى هذي الفيتامينات الي تنصرف بالصيدلية بدون وصفه اقولك خذيها بوصفه دكتور حتى موصيدلي بعد
انا شفت بعيني بنات تفلسفوا وندموا بعدين شي يؤثر على شي الجسم بتعب مع بعض
قبل فترة طلعت حبوب .. وكل العالم استخدمتها اسمها بايوتين وقالوا انها مره كويسه للشعر ! وهو بالأساس فيتامين B7 هذا الفيتامين اسمه فيتامين الجمال
وش يسوي هذا الفيتامين وهذي المعلومه معروفه عندنا حقين التغذية انه يساعد بهضم البروتين و امتصاصه
هذا الفيتامين الوحيد الي اذا اكلت منه جرعه زايده ما منه ضرر و السبب لانه ان زاد بالجسم تخلص منه عن طريق البول
هذا نقصه يأثر على شعرك اذا شفتي شعرك نافش ترا هذا احد الاسباب :/
هذا الفيتامين الجسم ما يصنعه و لا يخزنه
فاذا عندك مشاكل بالبشره او الشعر او مافي طاقه او قلبك ما يتحمل او دوخه على طول حللي الفيتامينات هذي
